A letter from Apr 23rd, 2021

Dear FutureMe, انا قولت اكتب بالعربي عشان اخد راحتي اكتر، مفيش حاجة حابة اني اقولها او خايفة بمعنى اصح، خايفة اتمنى حاجات ومتحصلش، خايفة افضل زي ما انا، خايفة من الفشل، خايفة افضل خايفة. مفيش حاجة قدامي غير ان انا اتمنالك انك تكوني حققتي اللي انتي عايزاه، فيه مشاعر كتير جوايا يارب تكون اتغيرت ساعتها، فيه ناس خسرتها السنة دي ومواقف صعبة كتير اوي، السنة دي غريبة اوي وكان فيها اصعب يوم عدى عليا في حياتي يوم ١٠/٠٣/٢٠٢١ يوم صعب اوي اوي حسيت فيه بحاجات عمري ما حسيتها في حياتي، احساس اهانة وذل وضعف وقلة حيلة، معرفش كان ده الصح ساعتها ان انا اخاف واسكت ولا اني احارب، انا عمري ما كرهت حد لدرجة الكره او ان لدرجة ان تكون الجنة واقفة على مسامحتي ليه ومسامحش، انا مش عايزة أذي حد بس بتمنى انه يحس نفس الاحساس اللي انا حسيته ساعتها، انا مش هاخد حقي لأني مش عارفة اعمل ايه ولأني واثقة في ربنا انه هياخدهولي، انا مش عايزة اي أذية كل اللي انا عايزاه هو العدل. ده الموقف الوحيد اللي افتكرته ده غير طبعا حركة الغباء اللي عملتها لما شوفت م بس ارجو ان هو يفضل موجود في حياتي وميشوفنيش بالطريقة اللي انا شوفت بيها نفسي ساعتها وهنشوف السنة الجاية لو ليا عمر ايه هيحصل. اتمنى اكون حققت شوية من اللي عايزة اعمله او على الاقل على بداية الطريق واكون اتعلمت من اخطائي وان انا مجلدش ذاتي وكل حاجة بتعدي وربنا دايما موجود معايا. اتمنى اكون موجودة واشوف الرسالة دي واشوف التطور اللي حصل في شخصيتي وحياتي ومستقبلي .